[ஈஸா குர்-ஆன் - Isa Koran] மத்தேயு 10:34: சமாதானத்தை அல்ல, பட்டயத்தையே அனுப்ப...

மத்தேயு 10:34ல் உள்ள பட்டயத்தைப் பற்றி ஒரு சுருக்கமான விளக்கம்

ஜேம்ஸ் அர்லண்ட்சன்

இயேசு கூறிய ஒரு குறிப்பிட்ட‌ வசனத்தைக் குறித்து கிறிஸ்தவர்கள் பெருமைபட்டுக் கொள்ளக் கூடாது என்று நான் அடிக்கடி வாசிக்கிறேன். அந்த வசனம் இப்படிச் சொல்லுகிறது:

"பூமியின் மேல் சமாதானத்தை அனுப்பவந்தேன் என்று எண்ணாதிருங்கள்; சமாதானத்தை அல்ல, பட்டயத்தையே அனுப்பவந்தேன்."

இவ்வசனத்தை மேலோட்டமாக படிக்கும் போது உண்மையில் ஒரு நியாயமான வன்முறையை இயேசு ஆதரிப்பதாகவும் தன்னுடைய சீடர்களை அதற்கு பயிற்றுவிப்பது போலவும் தெரியும். ஆனால் "வெளித்தோற்றம்" ஏமாற்றக்கூடியதாக இருக்கிறது. ஒரு வசனத்தை அதன் சரித்திர மற்றும் வசன பின்னணியின்றி படிக்கும்போது, அதன் அர்த்தம் முழுவதுமாக மாறிவிடுகிறது, இதனை ஆங்கிலத்தில் இவ்விதமாக கூறுவார்கள் "A text without a context often becomes a pretext". எனவே இந்த வசனத்தை சரித்திர மற்றும் வசன பின்னணியோடு படிக்கும்போது இதன் பொருள் சிறப்பாக மாறிவிடுகிறது.

இவ்வசனம் பற்றிய சரியான விளக்கத்திற்குள் இப்போது நாம் கடந்துச் செல்வோம்.

நாம் மேலே கண்ட வசனம் கூறப்பட்ட காலம், சரித்திர அமைப்பில், அது யூத கலாச்சாரம் என்பதையும், இயேசு தன்னுடைய மக்களுக்கு ஊழியம் செய்துக்கொண்டு இருந்தார் என்பதையும் நாம் நினைவில் கொள்ளவேண்டும். தன்னுடைய உயிர்த்தெழுதலுக்குப் பிறகு சந்திக்கப்படவிருக்கிற புறஜாதிகளிடத்தில் அனுப்பாமல் "காணமற் போன ஆடுகளாகிய இஸ்ரவேல் மக்களிடத்திற்கே" முதலாவது தன்னுடைய பன்னிரண்டு சீடர்களையும் இயேசு அனுப்புகிறார். சரித்திரப் பூர்வமாக சொன்னால், அவர் தன்னுடைய வார்த்தைகளை யூத மக்களாகிய த‌ன் சீடர்களைக் கொண்டு பரப்பினார் என்பதில் எந்த ஆச்சரியமுமில்லை. இரண்டாவதாக, தன் சீடர்களை சில பட்டணங்களின் மக்கள் ஏற்றுக்கொள்ளமாட்டார்கள் என்றும், அதன் அதிகாரிகள் அவர்களை விசாரணைக்கு ஒப்புக்கொடுத்து சாட்டையால் அடிப்பார்கள் என்றும் முன்னுரைத்தார். அப்படிப்பட்ட சந்தர்ப்பங்களில் அவர்கள் தங்கள் கால்களில் உள்ள தூசியை உதறிவிட்டு, அந்த பட்டணத்தை விட்டு வேறு இடத்திற்கு போய் விட வேண்டும், அவர்களுக்காக ஜெபம்பண்ண வேண்டும் என்று கூறினார். மூன்றாவதாக, முதலாம் நூற்றாண்டு யூதர்கள் இயற்கையாகவே இந்த புதிய பிரிவை அல்லது "இயேசு இயக்கத்தை" எதிர்த்தார்கள் (சில புதிய ஏற்பாட்டு சமூகவியலர் "இயேசு இயக்கம்" என்று கூறுவார்கள்). இப்படி இயேசுவின் சீடர்களுக்கு எதிர்ப்பு இருந்ததினால், இயேசு தன்னுடயை சக யூதர்களுக்கு எதிராக ஒரு சரீரப்பிரகாரமான‌ இராணுவ பட்டயங்களோடு கூடிய ஒரு புனிதப் போருக்கு தயாராகும் படி தன் சீடர்களுக்கு அழைப்புக் கொடுக்கிறார் என்று மேலே கண்ட வசனத்திற்கு பொருள் கொள்ளமுடியுமா? முக்கியமாக, தன் இனத்தார்களே, "இவருக்கு பையித்தியம் பிடித்திருக்கிறது" என்றுச் சொல்லி, இவரை தங்கள் கட்டுப்பாட்டிற்குள் வைக்க விரும்பியவர்களுக்கு எதிராக புனிதப்போரை புரியுங்கள் என்று இயேசு சொல்வதாக இந்த வசனத்திற்கு பொருள் கொள்ளமுடியுமா? (மாற்கு 3:21).

அடுத்ததாக, அந்த கலாச்சார சம்பவங்கள் குடும்ப‌ நபர்களுக்கு மத்தியில் இருக்கும் பிரிவினைகளைப் பற்றி தெளிவாக காண்பிக்கின்றது. மத்தேயு 10:34 ல் உள்ள "பட்டயம்" என்பதின் அர்த்தத்தை விளக்குவதற்கு, அவ்வசனத்தின் முன்பின் வசனங்கள் முழுவதுமாக‌ விளக்கப்பட வேண்டும்.

32. மனுஷர் முன்பாக என்னை அறிக்கை பண்ணுகிறவன் எவனோ, அவனை நானும் பரலோகத்திலிருக்கிற என் பிதாவின் முன்பாக அறிக்கைபண்ணுவேன்.

33. மனுஷர் முன்பாக என்னை மறுதலிக்கிறவன் எவனோ, அவனை நானும் பரலோகத்திலிருக்கிற என் பிதாவின் முன்பாக மறுதலிப்பேன்.

34. பூமியின்மேல் சமாதானத்தை அனுப்பவந்தேன் என்று எண்ணாதிருங்கள்; சமாதானத்தையல்ல, பட்டயத்தையே அனுப்பவந்தேன்.

35. எப்படியெனில்,

மகனுக்கும் தகப்பனுக்கும்,

மகளுக்கும் தாய்க்கும்,

மருமகளுக்கும் மாமிக்கும் பிரிவினையுண்டாக்க வந்தேன்.

36. ஒரு மனுஷனுக்குச் சத்துருக்கள் அவன் வீட்டாரே.

37. தகப்பனையாவது தாயையாவது என்னிலும் அதிகமாய் நேசிக்கிறவன் எனக்குப் பாத்திரன் அல்ல; மகனையாவது மகளையாவது என்னிலும் அதிகமாய் நேசிக்கிறவன் எனக்குப் பாத்திரன் அல்ல.

38. தன் சிலுவையை எடுத்துக்கொண்டு என்னைப் பின்பற்றாதவன் எனக்குப் பாத்திரன் அல்ல.

39. தன் ஜீவனைக் காக்கிறவன் அதை இழந்துபோவான்; என்னிமித்தம் தன் ஜீவனை இழந்துபோகிறவன் அதைக் காப்பான்.

இந்த நீண்ட வேதப் பகுதியில் ஒரு முக்கியமான ஆதார வார்த்தை "பட்டயம்" என்பதாகும், அதன் அர்த்தம் இப்போது தெளிவாக விளங்கியிருக்கும். ஒரு யூதன் இயேசுவின் சீடனாக மாறுவதினால், தன் சொந்த யூத குடும்பத்தில் "சமாதானம்" அல்ல, பிளவு தான் ஏற்படும். இந்த "பிரிவினை அல்லது பிளவைத்" தான் இயேசு "பட்டயம்" என்று உருவகப்படுத்தி கூறியுள்ளார். அதற்கு அவருடைய சீடர்கள் தயாரா? இந்த கண்ணுக்குத் தெரியாத‌ ஆவிக்குரிய பட்டயமானது ஒரு மனிதனை அவன் தகப்பனிடத்திலிருந்தும், மகளை தாயினிடத்திலிருந்தும் அப்படி பல உறவுகளை (மீகா 7:6) துண்டித்து விடுகிறது. துவக்கத்தில் இயேசுவின் சொந்த குடும்பமும் எதிர்த்தனர், பிறகு இணைந்தனர். இதனால் தான் " ஒருவன் என்னைப் பின்பற்ற விரும்பினால், என்ன நடந்தாலும் சரி, ஒருவேளை தன்னுடைய குடும்பத்தை இழக்க நேரிட்டாலும் சரி என்னை இறுதிவரைப் பின்பற்ற வேண்டும்" என்று இயேசு சொல்லியிருப்பது இயற்கையானது. ஆனால் இது, ஒரு குடும்பத்தினர் புதிதாக இயேசுவை ஏற்றுக்கொண்ட‌வரை வெறுத்து ஒதுக்கும் போது மட்டுமே பொருந்தும், அவருடைய புதிய நம்பிக்கையில் அவரை ஏற்றுக்கொள்ளும் போது அந்த குடும்பத்தை அவர் வெறுத்து ஒதுக்கக்கூடாது. ஏனென்றால் இயேசு வந்ததின் முழு நோக்கமே எவ்வளவுக்கு அதிகமான மக்களை ஜெயித்து அவர் பக்கமாய் சேர்க்க முடியுமோ சேர்க்க வேண்டும், ஒருவேளை அது உலகமே இரண்டாக பிரிந்தாலும் பரவாயில்லை, ஆனால் வன்முறை இல்லாமல் செய்யப்படவேண்டும்.

இன்னும் கூட நாம் இதற்கான நீண்ட வசன‌ பின்னணியை மத்தேயு சுவிசேஷத்திலிருந்து குறிப்பிடலாம். கெத்சமனே தோட்டத்தில் இயேசு காட்டிக் கொடுக்கப்பட்டு கைது செய்யப்படும் வேளையில், பேதுரு தன்னுடைய ஆண்டவரை காப்பாற்றுவதற்காக பிராதான ஆசாரியனுடைய வேலைக்காரனின் காதை வெட்டுகிறான். ஆனால் இயேசு அவனை நிறுத்தச் சொல்லுகிறார்.

மத்தேயு 26:52-53 சொல்லுகிறது:

52. அப்பொழுது, இயேசு அவனை நோக்கி: உன் பட்டயத்தைத் திரும்ப அதின் உறையிலே போடு; பட்டயத்தை எடுக்கிற யாவரும் பட்டயத்தால் மடிந்து போவார்கள்.

53. நான் இப்பொழுது என் பிதாவை வேண்டிக்கொண்டால், அவர் பன்னிரண்டு லேகியோனுக்கு அதிகமான தூதரை என்னிடத்தில் அனுப்பமாட்டாரென்று நினைக்கிறாயா?

இறைவனுயை விருப்பத்தை நிறைவேற்ற வன்முறை தான் வழி என்பதை இயேசு மறுக்கிறார்- இறைவனின் விருப்பத்தை வன்முறையை பின் பற்றியாவது நிறைவேற்ற பேதுரு நினைத்திருந்திருப்பார். பின்னர், தன் கட்டளைக்காக பன்னிரண்டு பெரும் இராணுவத்திற்கும் அதிகமாக தூதர்கள் காத்திருக்கிறார்கள் என்று இயேசு கூறுகிறார். அவர் ரோம ராஜ்ஜியத்தை தவிடு பொடியாக்க வரவில்லை மாறாக தன்னுடைய ஜீவனை கொடுத்து உலக மக்களின் பாவங்களுக்காக மரிக்க வந்தார். இந்த உலகம் அந்த அற்புதமான பரிசை ஏற்றுக் கொள்ளுமா?

இப்பொழுது நாம் இன்னும் பெரிய வாக்கிய பின்னணியத்தைப் பார்ப்போம். லூக்கா சுவிசேஷத்திலுள்ள ஒரு இணை பகுதி பட்டயம் உருவகமாக பயன்படுத்தப்படுவதை உறுதி செய்கிறது.

லூக்கா 12:49-53 கூறுகிறது:

49. பூமியின்மேல் அக்கினியைப் போடவந்தேன், அது இப்பொழுதே பற்றி எரிய வேண்டுமென்று விரும்புகிறேன்.

50. ஆகிலும் நான் முழுகவேண்டிய ஒரு ஸ்நானமுண்டு, அது முடியுமளவும் எவ்வளவோ நெருக்கப்படுகிறேன்.

51. நான் பூமியிலே சமாதானத்தை உண்டாக்கவந்தேன் என்று நினைக்கிறீர்களோ? சமாதானத்தையல்ல, பிரிவினையையே உண்டாக்கவந்தேன் என்று உங்களுக்குச் சொல்லுகிறேன்.

52. எப்படியெனில், இதுமுதல் ஒரே வீட்டிலே ஐந்துபேர் பிரிந்திருப்பார்கள், இரண்டுபேருக்கு விரோதமாய் மூன்றுபேரும், மூன்றுபேருக்கு விரோதமாய் இரண்டுபேரும் பிரிந்திருப்பார்கள்.

53. தகப்பன் மகனுக்கும் மகன் தகப்பனுக்கும், தாய் மகளுக்கும் மகள் தாய்க்கும், மாமி மருமகளுக்கும் மருமகள் மாமிக்கும் விரோதமாய்ப் பிரிந்திருப்பார்கள் என்றார்.

மத்தேயு மற்றும் லூக்கா சுவிசேஷத்தில் உள்ள இரண்டு ஒரே மாதிரியான பகுதிகளும் இரண்டு வெவ்வேறான சூழ்நிலைகளை பிரதிபலிக்கிறது எனலாம். நானும் கூட ஒரு தலைப்பை இரண்டு வகுப்புகளில் கற்றுக் கொடுக்கும்போது, நான் கற்றுக்கொடுக்கப்போகும் தலைப்பில் சில வார்த்தைகளை மாற்றுவதுண்டு. வகுப்பில் யாருக்கும் அந்த சிறிய மாற்றம் தெரியப்போவதில்லை, அது ஒரு பொருட்டல்ல ஏனென்றால் தலைப்பின் அர்த்தம் மாறுவதில்லை. அதைப் போலவே, இயேசு கற்றுக் கொடுத்த இந்த மூன்று வருடங்களில் அவர் இஸ்ரவேலர்களுக்கு போதிக்கும் போது வெவ்வேறான‌ பார்வையாளர்களுக்கு அவர் அநேக முறை (சுவிசேஷகங்களில் இரண்டு முறை பதிவு செய்யப்பட்டிருந்த போதும்) இந்த அர்ப்பணிப்பின் அழைப்பைக் மீண்டும் மீண்டுமாக கொடுத்துள்ளதாக அறியலாம். தன் போதனையை கேட்பவர்களிடம், அவர்களுடைய சிலுவையை எடுத்துக் கொண்டு தன்னைப் பின்பற்றி வரவேண்டும் என்ற தீவிரமான அழைப்பை அடிக்கடிக் கொடுத்திருக்கிறார். (மத் 16: 24, மாற்கு 8:34, லூக்கா 9:23, 14:27). எது எப்படியிருந்தாலும், வேத வாக்கியங்களுக்கு விளக்கம் கொடுக்கும் சரியான முறை என்பது வசனங்களே வசனங்களை தெளிவுபடுத்துவதற்கு விட்டு விடுவதாகும், அதிலும் குறிப்பாக ஒரே மாதிரியான வேத பகுதிகளை ஆராயவேண்டும். இப்பொழுது லூக்கா 12: 49-53 நம்முடைய மத்தேயு 10:34 விளக்கத்தை உறுதிபடுத்துகிறது. இயேசு ஒருவருடைய சொந்த குடும்பத்திற்கு விரோதமான சரீர வன்முறையை ஆதரிக்கவில்லை மாறாக குடும்பத்தில் பிரிவினைகள் உண்டாவதற்கான வாய்ப்புகளைப் பற்றி அவர் எச்சரிக்கிறார் (Jesus did not endorse physical violence against one's own family, but he warns people about possible family division).

மேலே விவரிக்கப்பட்ட அனைத்து விவரங்களிலிருந்து நாம் அறிந்துக்கொள்வது என்ன?

இயேசு ஒருபோதும் எந்த ஒரு மனிதன் மீதும் பட்டயத்தை உபயோகிக்கவில்லை என்பதை சரித்திரம் நமக்கு தெளிவாக சித்தரிக்கிறது. மேலும் மத்தேயு 10:34 ம் வசனத்தில் தன்னைப் பின்பற்றுபவர்களுக்கு யார் மீதும் பட்டயத்தை சுழற்றுவதற்கோ எந்தக் காரணத்திற்காகவும், குடும்பத்தில் தம்மை எதிர்ப்பவர்களை கொல்லுவதற்கோ அவர் கட்டளையிடவில்லை. ஆனால் ஒரு உண்மையான சீடன் இயேசுவை பூரணமாக பின்பற்றும் போது எதிர்ப்பு நிறைந்த குடும்பத்திலிருந்து வரும் போது தன்னுடைய சிலுவை சுமக்கும் (சீடனுக்ககான அழைப்பில் மற்றொரு உருவகம்) அளவுக்கு எல்லாவித எதிர்ப்புகளிலிருந்து தன்னை துண்டித்துக் கொள்வதற்கு விரும்பி ஆன்மீக பட்டயத்தை (சரீரப் பிரகாரமான உண்மை பட்டயத்தை அல்ல) உபயோகிக்க வேண்டும். இயேசு இந்த உலகத்தை இரண்டு பிரிவாக பிரிக்கிறார் என்பது உண்மையே, அவரைப் பின்பற்றுபவர்கள் அவரைப் பின்பற்றாதவர்கள், வெளிச்சத்தில் உள்ளவர்கள் இருளில் உள்ளவர்கள். இருந்தபோதும் தன்னுடைய சீடர்களிடத்தில் எல்லார் மீதும் போர் தொடுங்கள் குறிப்பாக ஒருவனுடைய குடும்பத்தின் மீது மீதும் போர் தொடுங்கள் என்று நிச்சயமாகக் கூறவில்லை.

ரோமப் பேரரசர் கான்ஸ்டான்டைன், மத்திய படையெடுப்பாளர்கள், புரட்டஸ்டன்ட்கள் மற்றும் கத்தோலிக்கர்கள் அவிசுவாசிகள் மீதும் மற்றவர்கள் மீதும் பட்டயத்தை உபயோகித்தார்கள் என்பது உண்மை தான். இருந்தாலும் அவர்களில் ஒருவரேனும் கிறிஸ்தவத்திற்கு அஸ்திபாரம் கிடையாது, இயேசு மட்டுமே கிறிஸ்தவத்திற்கு அஸ்திபாரம். அவர் ஒருபோதும் தன்னுடைய செய்தியை பரப்புவதற்கு பட்டயத்தை ஆதரிக்கவில்லை. மேலும் கிறிஸ்தவம் ஒரு மறுமலர்ச்சிக்குள் பிரவேசித்தது (கி.பி 1400-1600). மேலும் ஞானஉபதேசத்தின் அழுத்தத்தில் கிறிஸ்தவம் விடப்பட்டது (கி.பி 1600-1800) அது சமாதானத்தை கோரியது. இவைகள் ஒருபக்கமிருக்க‌, இயேசு ஒருபோதும் ஒரு இராணுவப் புனிதப் போரை அறிவிக்கவில்லை, அவர் தன்னுடைய இயக்கத்திற்கு ஒழுக்க நெறிகளை மட்டுமே நியமித்தார்.

புதிய ஏற்பாட்டிலே சுவிசேஷத்தைப் பரப்புவதற்கோ, சபைகளை நாட்டுவதற்கோ அல்லது வேறு எதையும் சாதிப்பதற்கோ சபையானது பட்டயத்தை உபயோகிக்க வேண்டும் என்று ஒரு வசனம் கூட இல்லை. மாறாக புதிய ஏற்பாடு பட்டயத்தை ஆளுகையிடம் அரசாங்கத்திடம் கொடுக்கிறது (ரோமர் 13:1-6). எந்த விதத்திலும் சரீரப் பிரகாரமான பட்டயத்தை அல்ல ஆவிக்குரிய பட்டயத்தை எடுக்க இயேசு கூறுகிறார், ஒருவேளை குடும்ப உறவுகளைத் துண்டிக்க நேர்ந்தாலும் சீடர்கள் அதற்கு தயாராக இருக்கவேண்டும்.

ஆங்கில மூலம்: A Brief Explanation of the Sword in Matthew 10:34

ஜேம்ஸ் அர்லண்ட்சன் அவர்களின் கட்டுரைகள்

Tamil Source: http://www.answering-islam.org/tamil/authors/arlandson/matthew_10_34.html

[ஈஸா குர்-ஆன் - Isa Koran] அல்லாஹ் ஜெபங்களுக்கு பதில் அளிக்கிறாரா?

அல்லாஹ் ஜெபங்களுக்கு பதில் அளிக்கிறாரா?

ஆசிரியர்: முடே அல்ஃபதி

பல சமயங்களில் நமது இஸ்லாமிய நண்பர்கள் தங்களது அல்லாஹ்வைக் குறித்து உண்மைக்கு மாறாக மிகவும் நேர்த்தியான ஒரு தோற்றத்தைக் காட்ட முயற்சிக்கிறார்கள். அதாவது அல்லாஹ் பைபிளின் தேவனைப் போல‌, கருணையும் அன்பும் நிறைந்தவராக இஸ்லாமியர்களால் சித்தரிக்கப்படுகிறார்.

தீவிர‌ இஸ்லாமிய நாடாகிய ச‌வுதி அரேபியாவில் என்னுடைய சொந்த ஊரில் ஒரு பக்தி வைராக்கியமான வஹாபி முஸ்லீமாக வாழ்ந்து, கிறிஸ்தவர்களுடன் எவ்விதத் தொடர்புமின்றி வளர்ந்த நான், இப்போது என்னுடைய‌ இஸ்லாமிய மக்கள், கிறிஸ்தவர்களிடம் அல்லாஹ்வைப் பற்றியும் இஸ்லாமைப் பற்றியும் பகிர்ந்துகொள்ளும் ஒரு சில விவாதங்களைக் குறித்து மிகவும் ஆச்சரியப்படுகிறேன். அவர்கள் அல்லாஹ்வைக் குறித்து, மசூதிகளில் நான் ஒருபோதும் கேள்விப்பட்டிராத வண்ணமாயும், குறிப்பாக மதப் பற்றான முஸ்லீம்களின் மத்தியில் சொல்லப்படாத வகையினில் அவரை ஒரு மாறுபட்ட விதமாகச் சித்தரிக்கின்றார்கள். மக்கள் அல்லாஹ்வை, கூப்பிடும் போதெல்லாம் ஜனங்களின் ஜெபங்களைக் கேட்டு அதற்கு பதிலளிக்கும் கடவுளாக அல்லாஹ்வை சித்தரிக்க முஸ்லீம்கள் அரும்பாடு படுகிறார்கள். இந்தக் காரணத்திற்காக அவர்கள் சில கு‍ர்‍ஆன் வசனங்களை நம் முன் வைக்கிறார்கள், ஆனால் அவைகளைச் சற்று ஆராய்வோமானால், அவர்களின் கூற்றுக்கு எதிரானவையாக அவ்வசனங்கள் இருப்பதைக் காணலாம். அதாவது, அவர்கள் காட்டும் கடவுள், சாதாரண மனிதர்களைப் போலவே அவர்கள் மீது உண்மையான அக்கரை கொண்டவராக அல்லாமல், மாறாக தமது நலனிலேயே குறியாக இருப்பவராகவே இவ்வசனங்கள் நமக்குக் காண்பிக்கின்றன‌.

நமது ஜெபங்களுக்குப் பதிலளிப்பதில் அல்லாஹ் விருப்பம் கொண்டவராகவோ அல்லது அவ‌ர் நமது விண்ணப்பங்களை நாம் இருக்கும் வண்ணமாகவே அவரிடம் சொல்ல‌ சாத்தியமுள்ளவராகவோ நாங்கள் ஒருபோதும் கற்பிக்கப்பட்டதில்லை. ஆயினும், ஒரு மேற்கத்திய நாட்டில் வசிக்கும் நான், பைபிள் போதிக்கும் தேவனின் சாயலை இஸ்லாமியர்கள், அல்லாஹ்வுக்கு ஒப்பாக்கவும், அவர் பைபிளின் தேவன் போன்றே கருதப்படவும் வேண்டுமென்று முயற்சிக்கிறார்கள் எனக் காண்கிறேன். அதாவது, வேறு விதமாகச் சொல்வோமாயின், அல்லாஹ்வின் தோற்றத்தை அவர்கள் "கிறிஸ்துவ மயமாக்க" (Christianize Allah's image) முயற்சிக்கிறார்கள் .

இச்சிறிய கட்டுரையில், மேற்கத்திய முஸ்லீம்கள் அல்லாஹ்வை எவ்விதம் சித்தரிக்கிறார்கள் என்பதற்கு ஒரு உதாரணத்தைக் காண்பிக்க விரும்புகிறேன். இதற்காக இஸ்லாமியர்கள் பொதுவாகக் குறிப்பிட்டுக் காட்டும் இரண்டு குர்‍ஆன் வசனங்களையும், அதற்கான இஸ்லாமிய அறிஞர்களின் அதிகார பூர்வமான விளக்கங்களையும் எடுத்துக் கொள்ளுவோம். அவைகளின் மூலம் நமது வாசகர்களும், குறிப்பாக இஸ்லாமின் ஆதரவாளர்களும், "அல்லாஹ்வின் கருணையும் நம் ஜெபங்களுக்கான அவரின் பதிலும்" சில இஸ்லாமிய நண்பர்களின் மனதில் உதித்த‌ புதிய‌ விருப்பத்தின் தோற்றமே தவிர வேறல்ல என்பதினைத் தாமே புரிந்துகொள்ளும் வகையில் ஒரு எளிதாக்கப்பட்ட விளக்கத்தினைக் கொடுக்க முற்படுகின்றேன்.

நாம் ஆராய‌ப்போகும் முத‌லாவ‌து வ‌ச‌ன‌ம் சூரா: 2:186 ல் அட‌ங்கியுள்ள‌து

(நபியே!) என் அடியார்கள் என்னைப் பற்றி உம்மிடம் கேட்டால்; "நிச்சயமாக நான் சமீபமாகவே இருக்கிறேன், பிரார்த்தனை செய்பவரின் பிரார்த்தனைக்கு அவர் பிரார்த்தித்தால் விடையளிக்கிறேன்;, அவர்கள் என்னிடமே (பிரார்த்தித்துக்) கேட்கட்டும்;, என்னை நம்பட்டும். அப்பொழுது அவர்கள் நேர்வழியை அடைவார்கள்" என்று கூறுவீராக.

"And when My servants ask you concerning Me, then surely I am very near; I answer the prayer of the suppliant when he calls on Me, so they should answer My call and believe in Me that they MAY walk in the right way." – Q. 2:186 Shakir (emphasis ours)

இந்த வசனம் எடுத்த எடுப்பில், இஸ்லாமிய‌ரின் க‌ட‌வுளாகிய‌ அல்லாஹ், அவரைப் பின்பற்றுவோரின் ஜெபங்களைக் கேட்டு அவைகளுக்குப் பதிலளிப்பவராக தெரிந்தாலும், இவ்வசனத்தின் வரிகளுக்கு ஊடே இழையோடியிருக்கும் அர்த்தத்தைச் சிந்திப்போமானால், இவ்விதம் நடைபெறுவதற்குச் சில நிபந்தனைகள் இடப்பட்டிருப்பதினைக் காணலாம்.

1. அல்லாஹ்வை நோக்கிக் கூப்பிடும் நபரை இந்த வசனம் அல்லாஹ்வின் கட்டளைகளைக் கைக்கொள்ளும்படிச் சொல்கின்றது. அதாவது அந்த நபர் தனது கடமையைச் செய்தல் வேண்டும்; அநீதியானவற்றையோ அல்லது அல்லாஹ் வெறுக்கும் காரியங்களையோ செய்தல் கூடாது.

2. அந்த நபர் உண்மையிலேயே அல்லாஹ்வின் மீது நம்பிக்கை கொண்டிருக்க வேண்டும். குழப்பம் இங்குத் தான் உருவாகின்றது. இந்த வசனம் அல்லாஹ்வால் அவரது அடியார்க்கு (இஸ்லாமியர்கள்) கொடுக்கப்பட்டிருந்தால், அவர்கள் அல்லாஹ்வை நம்பும்படிக்கு மறுபடியும் கேட்டுக் கொண்டிருக்கப்படுவதின் அவசியம் என்ன? இது அல்லாஹ் அவர்களின் பக்தியினையும் அவர்களது உள்ளுணர்வினையும் குறித்துச் சந்தேகத்துடன் இருப்பதாகத் தோற்றமளிக்கிறது. உண்மையில், இவ்விதமான எதிர்பார்ப்பு, அல்லாஹ், அவரது அடியார்கள் அவரை நோக்கிக் கூப்பிடும்போதெல்லாம் அவர்களுக்கு பதிலளிக்கும்படியான உறுதியினை வழங்கும் தெய்வம் அல்ல என்பதனையே காட்டுகின்றது.

3. இந்த‌ வ‌ச‌ன‌ம், அல்லாஹ்வை நோக்கிக் கூப்பிடும் ஒருவருக்கு, அவர் அல்லாஹ்வின் எல்லாக் கட்டளைகளுக்கும் கீழ்ப்படிந்து நல் வழியில் நடந்திருப்பினும் அவ‌னின்/அவ‌ளின் ஜெப‌ங்க‌ளுக்கு அவ‌ர் உண்மையிலேயே ப‌தில‌ளிப்பார் என்கின்ற வகையில் எந்த விதமான‌ உத்திரவாத‌த்தையும் கொடுக்க‌வில்லை.

அல்-குர்துபி (Al Qurtubi)^[1], இந்த வசனத்தின் விளக்க உரையில், ஒரு முஸ்லீமின் வேண்டுதல் அல்லாஹ்வினால் பதிலளிக்க‌ப்படுவதற்குச் சில நிபந்தனைகள் உள்ளன எனக் குறிப்பிடுகிறார்:

• அல்லாஹ்வை நோக்கி ஜெபித்து விண்ணப்பம் செய்யும் ஒருவர் அறிந்தோ அல்லது அறியாமலோ அல்லாஹ்விற்கு எதிரான பாவங்களைச் செய்து இருத்தலாகாது. இதற்கு ஆதாரமாக அவர் சூரா 7:55 ஐக் காட்டுகிறார்.

(ஆகவே, முஃமின்களே!) உங்களுடைய இறைவனிடம் பணிவாகவும், அந்தரங்கமாகவும் பிரார்த்தனை செய்யுங்கள் - வரம்பு மீறியவர்களை நிச்சயமாக அவன் நேசிப்பதில்லை.

"வரம்பு மீறுதல்" என்றால் என்ன‌?

அல்-குர்துபி சொல்வதின்படி இதன் அர்த்தம் என்னவென்றால்:

• தடை செய்யப்பட்ட எவற்றையும் கேளாதிருத்தல்

• உங்களுடைய வாழ்கையில், உங்கள் பணத்திற்கு வட்டி வாங்குதல், பிறர் பொருளை அபகரித்தல், பணப் பற்றுவரவில் நாணயமற்று இருத்தல் போன்ற பாவங்கள் செய்து கொண்டிருக்கும் போது அல்லாஹ்விடம் எதனையும் கேளாதிருத்தல்.

• தான் கேட்பதற்கு அல்லாஹ் பதிலளிப்பாரென்ற நம்பிக்கையின்றி ஒரே காரியத்தை தொடர்ந்து கேட்டுக்கொண்டேயிருத்தல்.

• அல்லாஹ்வை நோக்கிக் கூப்பிடும் ஒருவர் தெளிவான சிந்தையுடன் தூய மனதுடன் அவ்வாறு செய்ய வேண்டும். ஜெபிக்கும் போது மனதினை வேறு திசையில் அலைய விடக்கூடாது.

உண்மையில், இபின் அட்டாவின் (Ibn Atta) கூற்றுப்ப‌டி அல்லாஹ்வை வேண்டிக்கொள்ளும் போது, வேண்டிக்கொள்ளும் ந‌ப‌ர் க‌டைப்பிடிக்க‌ வேண்டிய‌ சில‌ நிபந்தனைக‌ள் உள்ளன‌ என‌ அல்-குர்துபி சொல்கிறார். இந்த‌ நிபந்த‌னைக‌ள் கீழ்க‌ண்ட‌வ‌ற்றை உள்ள‌ட‌க்கிய‌து:

• மனத்தாழ்ச்சியுடன் கூடிய பணிவு, பயம், நம்பிக்கை, தொடர்ந்து விண்ணப்பித்தல், தடை செய்யப்படாத உணவையே (ஹலால்) உண்ணுதல்.

• விண்ணப்பம் செய்தல் உண்மையுடன் கூடியதாக இருக்க வேண்டும் என இபின் அட்டா கூறுகிறார்.

• விண்ணப்பம் செய்தல், கீழ்கண்டவாறு ஏற்ற வேளையிலே செய்யப்படுதல் வேண்டும்:

o உப‌வாச‌த்தை முடிக்கும் போதோ அல்ல‌து விடிய‌லுக்கு முன்பாக‌ உப‌வாச‌த்தைத் தொட‌ங்கும் போதோ, தொழுகைக்கான‌ அழைப்பிற்கும் தொழுகை ஆரம்பிக்கும் வேளைக்கும் இடைப்பட்ட நேரம், நாளின் இரண்டாவது மற்றும் மூன்றாவது தொழுகை வேளைக்கு இடைப்ப‌ட்ட‌ நேர‌ம், ம‌ற்றும் புத‌ன் கிழ‌மைக‌ள். ஏனைய‌ வேளைக‌ள் தேவைக்கேற்ப துரித ம‌ற்றும் அவ‌ச‌ர‌ கால‌ங்க‌ளை உள்ள‌ட‌க்கும்.

o விண்ணப்பத்தின் முதன்மையான நோக்கம் முஹம்மது நபியினை மகிமைப்படுத்தும் வண்ணம் இருத்தல் வேண்டும்.

o விண்ணப்பம் கேட்பதற்குத் தெளிவாக இருக்கும் வண்ணம் செய்தல் வேண்டும். முணுமுணுத்தல் இருத்தலாகாது.

மேலே கண்ட நிபந்தனைகளை வாசிக்கும்போது, கட்டுகளுடன் கூடிய ஒரு சட்டரீதியான ஒப்பந்த பத்திரத்தினை வாசிப்பது போன்ற ஒரு உணர்வினையே ஒருவர் பெறுவாரேயன்றி, திறந்த வாசலை உடையவர் என்று வர்ணிக்கப்படக்கூடிய கடவுளின் (அல்லாஹ்) வார்த்தைகளைப் ப‌டிக்கும் உணர்வினை அடையமாட்டார்.

நாம் ஆராய‌ப் போகும் அடுத்த‌ வ‌ச‌ன‌ம் சூரா 40:60ல் அட‌ங்கியுள்ள‌து.

وَقَالَ رَبُّكُمُ ادْعُونِي أَسْتَجِبْ لَكُمْ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ

உங்கள் இறைவன் கூறுகிறான்; "என்னையே நீங்கள் பிரார்த்தியுங்கள்; நான் உங்(கள் பிரார்த்தனை)களுக்கு பதிலளிக்கிறேன்; எவர்கள் என்னை வணங்குவதை விட்டும் பெருமையடித்துக் கொண்டிருக்கிறார்களோ, அவர்கள் சிறுமையடைந்தவர்களாக நரகத்தில் நுழைவார்கள்."

"And your Lord says: Call upon Me, I will answer you; surely those who are too proud for My service shall soon enter hell abased" – Q. 40:60 Shakir

அரபியில் இது கீழ் கண்டவாறு வாசிக்கப்படுகிறது^[2].

"Waqala rabbukumu odAAoonee astajib lakum inna allatheena yastakbiroona AAan AAibadatee sayadkhuloona jahannama dakhireena"

மேலே காணப்பட்ட வசனத்தில் ஆய்வுக்குரிய வார்த்தை "Call upon Me" அரபி மொழியில் "odAAoonee" (ادْعُونِي) என்பதாகும். இதன் விளக்கத்தினை/விளக்கவுரையை^[3] நாம் வாசிப்போமானால், ஆரம்ப கால இஸ்லாமியர்கள் "odAAoonee" (ادْعُونِي)" என்ற வார்த்தைக்கு "என்னையே தொழுதுக்கொள்ளுங்கள் – Worship me" அல்லது "சேவியுங்கள் – Serve me" என்றே பொருள் கொண்டார்கள் என்பதினைக் காணலாம். உண்மையில் இஸ்லாமின் நபியாகிய முஹம்மதுவிடம், இந்த வசனத்தின் பொருள் குறித்துக் கேட்டபோது, "Call upon Me" அல்லது "odAAoonee" (ادْعُونِي)" என்ற வார்த்தை அரபி மூலத்தில் "D-A-A" (دعا) என்பதில் இருந்து உருவாக்கப்பட்டது எனக் காண்பித்தார். அவரது கூற்றின்படி இந்த வார்த்தையின் அர்த்தம் என்னவெனில் "அல்லாஹ்வைத் தொழுகையின் மூலம் சேவித்தல் - serve Allah in worship" என்பதாகும். (அதாவது அரபியில் Ibada). மேலும், முஹம்மது உபயோகித்த வார்த்தையை நாம் அரேபிய அகராதியில்^[4] பார்த்தால் ("A-B-D" (عبد) ) என்ற மூல வார்த்தை "சமய தொழுகையை – Religious Worship" குறிப்பதை காணலாம்.

இஸ்லாமிய‌ர்க‌ள், அல்லாஹ் தங்களின் ஜெபங்களுக்கு பதிலளிக்கக் காட்டும் ஆர்வத்திற்கு ஆதாரமாகச் சொல்லும் இந்த இரு வசனங்களை நன்கு ஆராய்ந்த பின்பு இவைகளில் இதற்கான சான்றோ, அல்லாஹ்வின் பதிலளிக்கும் முனைப்போ அல்லது அவர்களை அவர் இக்கட்டுகளிலிருந்து காப்பாற்ற விரைந்து வரும் பண்போ இருப்பதாக சிறிதளவேனும் நம்மால் காண முடியவில்லை. இதற்கு ஒப்பீடாகவுள்ள மெய்யான கடவுளாகிய பைபிளின் தேவன் அவரைப் பின்பற்றுவோருக்கு தங்களின் ஜெபங்களுக்கு பதிலினை காலங்காலமாக வாக்களிப்பவராக இருக்கிறார்.

"ஆபத்துக் காலத்தில் என்னை நோக்கிக் கூப்பிடு; நான் உன்னை விடுவிப்பேன், நீ என்னை மகிமைப் படுத்துவாய்." (சங்கீதம் 50:15)

"கேளுங்கள், அப்பொழுது உங்களுக்குக் கொடுக்கப்படும்; தேடுங்கள், அப்பொழுது கண்டடைவீர்கள்; தட்டுங்கள் அப்பொழுது உங்களுக்குத் திறக்கப்படும். ஏனென்றால், கேட்கிற எவனும் பெற்றுக்கொள்ளுகிறான்; தேடுகிறவன் கண்டடைகிறான்; தட்டுகிறவனுக்குத் திறக்கப்படும். உங்களில் எந்த மனுஷனானாலும் தன்னிடத்தில் அப்பத்தைக்கேட்கிற தன் மகனுக்குக் கல்லைக் கொடுப்பானா? மீனைக்கேட்டால் அவனுக்குப் பாம்பைக்கொடுப்பானா? ஆகையால், பொல்லாதவர்களாகிய நீங்கள் உங்கள் பிள்ளைகளுக்கு நல்ல ஈவுகளைக் கொடுக்க அறிந்திருக்கும்போது, பரலோகத்திலிருக்கிற உங்கள் பிதா தம்மிடத்தில் வேண்டிக் கொள்ளுகிறவர்களுக்கு நன்மையானவைகளைக் கொடுப்பது அதிக நிச்சயம் அல்லவா?" (மத்தேயு 7:7-11)

"மெய்யாகவே மெய்யாகவே நான் உங்களுக்குச் சொல்லுகிறேன்; நான் என் பிதாவினிடத்திற்குப் போகிறபடியினால், என்னை விசுவாசிக்கிறவன் நான் செய்கிறகிரியைகளைத் தானும் செய்வான், இவைகளைப் பார்க்கிலும் பெரிய கிரியைகளையும் செய்வான். நீங்கள் என் நாமத்தினாலே எதைக் கேட்பீர்களோ, குமாரனில் பிதா மகிமைப்படும்படியாக, அதைச் செய்வேன். என் நாமத்தினாலே நீங்கள் எதைக்கேட்டாலும் அதை நான் செய்வேன்." (யோவான் 14:12-14)

"அந்த நாளிலே நீங்கள் என்னிடத்தில் ஒன்றுங் கேட்கமாட்டீர்கள். மெய்யாகவே மெய்யாகவே நான் உங்களுக்குச் சொல்லுகிறேன், நீங்கள் என் நாமத்தினாலே பிதாவினிடத்தில் கேட்டுக்கொள்வதெதுவோ அதை அவர் உங்களுக்குத் தருவார். இதுவரைக்கும் நீங்கள் என் நாமத்தினாலே ஒன்றும் கேட்கவில்லை; கேளுங்கள், அப்பொழுது உங்கள் சந்தோஷம் நிறைவாயிருக்கும்படி பெற்றுக்கொள்வீர்கள்.… இவைகளை நான் உவமைகளாய் உங்களுடனே பேசுகிறேன்; காலம் வரும், அப்பொழுது நான் உவமைகளாய் உங்களுடனே பேசாமல், பிதாவைக்குறித்து வெளிப்படையாக உங்களுக்கு அறிவிப்பேன். அந்த நாளில் நீங்கள் என் நாமத்தினாலே வேண்டிக்கொள்வீர்கள். உங்களுக்காகப் பிதாவை நான் கேட்டுக்கொள்வேனென்று உங்களுக்குச் சொல்லவேண்டியதில்லை. நீங்கள் என்னைச் சிநேகித்து, நான் தேவனிடத்திலிருந்து புறப்பட்டுவந்தேனென்று விசுவாசிக்கிறபடியினால் பிதாதாமே உங்களைச் சிநேகிக்கிறார்." (யோவான் 16:23-27)

"அறிவுக்கெட்டாத அந்த அன்பை அறிந்துகொள்ள வல்லவர்களாகவும், தேவனுடைய சகல பரிபூரணத்தாலும் நிறையப்படவும், அவர் தமது மகிமையினுடைய ஐசுவரியத்தின்படியே, உங்களுக்கு அநுக்கிரகம் பண்ணவேண்டுமென்று வேண்டிக்கொள்ளுகிறேன். நாம் வேண்டிக்கொள்ளுகிறதற்கும் நினைக்கிறதற்கும் மிகவும் அதிகமாய் நமக்குள்ளே கிரியைசெய்கிற வல்லமையின்படியே, நமக்குச் செய்ய வல்லவராகிய அவருக்கு, சபையிலே கிறிஸ்து இயேசுவின் மூலமாய்த் தலைமுறை தலைமுறைக்கும் சதாகாலங்களிலும் மகிமை உண்டாவதாக. ஆமென்.(எபேசியர் 3:19-21).

"நாம் எதையாகிலும் அவருடைய சித்தத்தின்படிகேட்டால், அவர் நமக்குச் செவிகொடுக்கிறாரென்பதே அவரைப் பற்றி நாம் கொண்டிருக்கிற தைரியம். நாம் எதைக் கேட்டாலும் அவர் நமக்குச் செவிகொடுக்கிறாரென்று நாம் அறிந்திருந்தோமானால், அவரிடத்தில் நாம் கேட்டவைகளைப் பெற்றுக்கொண்டோமென்றும் அறிந்திருக்கிறோம்.." (I யோவான் 5:14-15)

இதன் பயனாக, நமது இஸ்லாமிய நண்பர்கள் முன்பு நாம் குறிப்பிட்ட‌ வசனங்களை முன்னிறுத்தி முனைவதினைக் குறித்து அவர்கள் தவறாக நடத்தப்படுகிறார்களோ அல்லது தவறாகப் பிறரை வழி ந‌டத்த விழைகிறார்களோ என்ற சந்தேகத்துடன் பார்ப்பதைத் தவிர‌ நமக்கு வேறு வழி இல்லை. இதன் பின்னணியில், உண்மையாகவே இக்காரியத்தினை ஆராய முற்படும் இஸ்லாமியர்களை நான் வரவேற்பதுடன், தேவன் தாமே இவர்களின் சத்திய தாகத்தினை ஆற்றும்படிக்கு வேண்டிக்கொள்கிறேன்.

"ஆகையால் குமாரன் உங்களை விடுதலையாக்கினால் மெய்யாகவே விடுதலையாவீர்கள்" (யோவான் 8:36)

கேட்கிறவரும் பதிலளிப்பவருமாகிய நம் ஆண்டவரும் மீட்பருமாகிய இயேசு கிறிஸ்துவுக்கே, சதாகாலங்களிலேயும் மகிமையும் மகத்துவமும் உண்டாகியிருப்பதாக, ஆமென்.

Footnotes

1 Arabic source, translation is my own.
2 Source
3 Ibn Kathir, Al Jalalayn, Al Tabari and Al Qurtubi
4 Lane's Lexicon, source

ஆங்கில மூலம்: Does Alah Answer Prayers?

ஆசிரியரின் இதர கட்டுரைகளை படிக்க‌வும்

"பைபிள் கூறும் பயங்கரவாதம் (3)" கட்டுரைக்கு பதில்: 3.1

கிறிஸ்தவன் பார்வையின்:

"பைபிள் கூறும் பயங்கரவாதம் (3)" கட்டுரைக்கு பதில்: 3.1

முன்னுரை:

கிறிஸ்தவம் பார்வை என்ற இஸ்லாமிய தளம் "பைபிளில் பயங்கரவாதம்" என்ற தலைப்பில் கட்டுரைகளை எழுதிக்கொண்டு வருகிறது. அவர்களின் இந்த தொடர் கட்டுரைகளுக்கு இதுவரை இரண்டு பதில்கள் தரப்பட்டுள்ளது, அவைகளை இங்கு படிக்கவும்: பாகம் 1 மற்றும் பாகம் 2.

இப்போது இவர்களின் மூன்றாம் பாகத்திற்கான பதிலை பார்க்கலாம். முதலில், கிறிஸ்தவம் பார்வை தளத்தின் அபூ அப்திர்ரஹ்மான் அவர்கள் என்ன எழுதியிருக்கிறார்கள் என்பதைக் காண்போம்.

அபூ அப்திர்ரஹ்மான்


பைபிள் கூறும் பயங்கரவாதம் (3)


"நீ ஆடையின்றி நிர்வாணமாக இருந்தாலும் ஆயுதமின்றி மட்டும் இருக்காதே" என்று பைபிள் கட்டளையிடுகிறது. பைபிளின் இவ்வசனப்படி கிறிஸ்தவர்கள் ஒவ்வொருவரும் கையில் ஒரு துப்பாக்கியின்றி இருக்கக் கூடாது. இக்கலாச்சாரத்தின் வெளிப்பாடாகத் தான் அமெரிக்காவில் பள்ளி மாணவன் சக மாணவனை துப்பாக்கியால் சுடுவது அடிக்கடி நிகழ்ந்து வருகிறதோ? பைபிளின் படி பல கடவுள்களை வணங்குபவர் கொலை செய்யப்படவேண்டும்


அன்பை, அகிம்சையையே பைபிள் போதிக்கிறது என்று மக்களை ஏமாற்றும் கிறிஸ்தவர்கள், "பல தெய்வ வழிபாடு உடையவர்கள் எல்லாம் கொல்லப்பட வேண்டும்" என்ற பைபிளின் உபதேசம் குறித்து மூச்சு விடுவதில்லை. தங்கள் மதப் பிரச்சாரத்தில் அத்தகைய வசனங்களை உட்படுத்துவதும் இல்லை.


நான் விலக்கியிருக்கிற வேறே தேவர்களையாவது சந்திரசூரியர் முதலான வானசேனைகளையாவது சேவித்து, அவைகளை நமஸ்கரிக்கிறதாகக் காணப்பட்டால்,. அது உன் செவிகேட்க உனக்கு அறிவிக்கப்படும் போது, நீ அதை நன்றாய் விசாரிக்கக்கடவாய்; அது மெய் என்றும் அப்படிப்பட்ட அருவருப்பு இஸ்ரவேலில் நடந்தது நிச்சயம் என்றும் கண்டாயானால், அந்த அக்கிரமத்தைச் செய்த புருஷனையாவது ஸ்திரீயையாவது உன் வாசல்களுக்கு வெளியே கொண்டுபோய், அப்படிப்பட்டவர்கள் சாகும்படி கல்லெறியக்கடவாய். (உபாகமம் - 17:2-5)


இஸ்லாம் வாளால் நிர்பந்தத்தால் பிரச்சாரம் செய்யப்பட்டது என்று உண்மைக்குப் புறம்பாக கூப்பாடு போடும் கிறிஸ்தவர்கள், மேற்கண்ட பைபிளின் கட்டளை குறித்து என்ன கூறப் போகிறார்கள்? அது பழைய ஏற்பாடு, அது செல்லாது என்று கூறினால் பழைய ஏற்பாட்டை இன்னும் வைத்துக் கொண்டிருப்பது ஏன்? அதையும் சேர்த்துத் தானே பரிசுத்த வேதாகமம் என்று கூறுகின்றனர்? ஒரு வாதத்துக்காக பழைய ஏற்பாட்டை நாங்கள் நிராகரிக்கிறோம் என்று கூறினால், "நீங்கள் உங்கள் ஆடைகளை விற்றாவது ஒரு ஆயுதத்தை வாங்கி வைத்துக்கொள்ளுங்கள்" என்று புதிய ஏற்பாட்டில் இயேசுவின் கட்டளையாகக் கூறப்பட்டிருப்பதைக் குறித்து என்ன விளக்கம் கூறுவார்கள்? ….

…


Source: http://christianpaarvai.blogspot.com/2009/02/3.html

இக்கட்டுரையில் அவர், முதலில் பழைய ஏற்பாட்டின் ஒரு சில வசனங்களை குறிப்பிட்டும், பிறகு புதிய ஏற்பாட்டின் ஒரு சில வசனங்களை குறிப்பிட்டும் எழுதியுள்ளார். இந்த பதிலில், நாம் பழைய ஏற்பாட்டின் வசனம் பற்றிய அவரது விமர்சனத்தை அலசுவோம், அடுத்த கட்டுரையில், புதிய ஏற்பாட்டின் வசனம் பற்றி காண்போம்.

பழைய ஏற்பாட்டிலிருந்து ஒரு சில வசனங்களை எடுத்துக்கொண்டு, தலையும் புரியாமல், காலும் புரியாமல் விரிவுரை கொடுத்துள்ளார், அபூ அப்திர்ரஹ்மான் அவர்கள்.

அவர் வாதத்தில் பொதிந்துள்ள கேள்விகள்


1) பழைய ஏற்பாட்டிலிருந்து சில வசனங்களை எடுத்துக்கொண்டு, இதைப் பற்றி ஏன் கிறிஸ்தவர்கள் மூச்சு விடுவதில்லை? என்று கேட்கிறார்.


2) "அக்கட்டளைகள் இஸ்ரவேல் மக்களுக்கு கொடுக்கப்பட்டது, அவைகள் சரித்திரம்" என்று கிறிஸ்தவர்கள் கூறினால்? பின் ஏன் அதனை இன்னும் படிக்கிறீர்கள்? அந்த பழைய ஏற்பாட்டையும் சேர்த்துத் தானே நீங்கள் "வேதம்" என்று கூறுகிறீர்கள்? என்று கேட்கிறார்? "பின்பற்றாத கட்டளைகளை" ஏன் உங்கள் வேதத்தில் வைத்துள்ளீர்கள் என்று கேட்கிறார்.

3) இவரது அறியாமையின் உச்சகட்டம், புதிய ஏற்பாட்டிலிருந்தும் அவர் பயங்கரவாதம் கட்டளைகளை கண்டுபிடித்து விட்டது தான்! இதைப் பற்றி அடுத்த கட்டுரையில் பார்க்கலாம்.

சுருக்கமாக சொல்லவேண்டுமானால், பழைய ஏற்பாட்டையும், சரித்திரத்தையும், இஸ்ரவேலுக்கு கொடுத்த கட்டளைகளையும் இன்னும் ஏன் கிறிஸ்தவர்கள் தங்கள் வேதத்தில் வைத்துள்ளார்கள்? என்று கேட்கிறார்.

குர்‍ஆனை நம்பும் முஸ்லீம்கள், ஒவ்வொரு முறை பைபிளைப் பற்றி அறியாமையில் விமர்சிக்கும் போதெல்லாம், பாவம், குர்‍ஆனினால் அவர்கள் அதிக பிரச்சனைக்குள்ளாகிவிடுகிறார்கள், இதற்கு ஒரு சான்று தான் இந்த கட்டுரையும்.

அபூ அப்திர்ரஹ்மான்


அன்பை, அகிம்சையையே பைபிள் போதிக்கிறது என்று மக்களை ஏமாற்றும் கிறிஸ்தவர்கள், "பல தெய்வ வழிபாடு உடையவர்கள் எல்லாம் கொல்லப்பட வேண்டும்" என்ற பைபிளின் உபதேசம் குறித்து மூச்சு விடுவதில்லை. தங்கள் மதப் பிரச்சாரத்தில் அத்தகைய வசனங்களை உட்படுத்துவதும் இல்லை.

இவர் சொல்வதை சரியாக படித்துப்பாருங்கள்,

"பல தெய்வ வழிபாடு உடையவர்கள் எல்லாம் கொல்லப்பட வேண்டும்" என்ற பைபிளின் உபதேசம் குறித்து மூச்சு விடுவதில்லை".

பல தெய்வ வழிப்பாடு செய்யும் அனைவரையும் கொல்லவேண்டுமென்றா பழைய ஏற்பாடு சொல்கிறது? உங்கள் முஹம்மது சும்மா இருந்த பக்கத்து நாட்டு மன்னர்களுக்கு கடிதம் எழுதி "இஸ்லாமை ஏற்றுக்கொள் இல்லையானால், கொல்லப்படுவாய்" என்று சொன்னது போலவா நீங்கள் மேற்கோள் காட்டிய வசனம் உள்ளது?

நீங்கள் மேற்கோள் காட்டிய வசனத்தை மறுபடியும் அப்படியே தருகிறேன்:

நான் விலக்கியிருக்கிற வேறே தேவர்களையாவது சந்திரசூரியர் முதலான வானசேனைகளையாவது சேவித்து, அவைகளை நமஸ்கரிக்கிறதாகக் காணப்பட்டால்,. அது உன் செவிகேட்க உனக்கு அறிவிக்கப்படும் போது, நீ அதை நன்றாய் விசாரிக்கக்கடவாய்; அது மெய் என்றும் அப்படிப்பட்ட அருவருப்பு இஸ்ரவேலில் நடந்தது நிச்சயம் என்றும் கண்டாயானால், அந்த அக்கிரமத்தைச் செய்த புருஷனையாவது ஸ்திரீயையாவது உன் வாசல்களுக்கு வெளியே கொண்டுபோய், அப்படிப்பட்டவர்கள் சாகும்படி கல்லெறியக்கடவாய். (உபாகமம் - 17:2-5)

உலகத்தில் மற்ற நாடுகளில் இருக்கும் பல தெய்வ வழி பாடு செய்யும் நபர்களை கொல்லச் சொல்கிறதா இந்த வசனம்? அபூ அப்திர்ரஹ்மான் அவர்களே கொஞ்சம் நிதானம் இழக்காமல் படித்துப்பாருங்கள்.

நீங்கள் மேற்கோள் காட்டிய வசனத்தில் கீழ் கண்ட‌ இவ்வார்த்தைகள் உள்ளதா? கொஞ்சம் பார்த்துச் சொல்கிறீர்களா?

"அது மெய் என்றும் அப்படிப்பட்ட அருவருப்பு இஸ்ரவேலில் நடந்தது நிச்சயம் என்றும் கண்டாயானால்"

அந்த அருவருப்பு எங்கு நடந்தால், இந்த தண்டனை என்று இவ்வசனம் சொல்கிறது?

"இஸ்ரவேலில் நடந்தால் இஸ்ரவேல் மக்கள் இப்படி செய்தால்", அவர்களுக்கு தண்டனை கொடுக்கவேண்டுமென்று தேவன் சொல்லியுள்ளார். இந்த கட்டளை மற்ற உலக நாடுகளுக்காக தரப்படவில்லை. ஆனால், நீங்கள் ஏன் அதனை அப்படியே "எல்லாருக்கும்" என்று பொதுப்படையாக சொல்லி இப்படி திருத்திச் சொல்கிறீர்கள்? இங்கு வசனத்தின் பொருளை மாற்றிச் சொல்லி, உலக மக்களை ஏமாற்றப் பார்ப்பது அபூ அப்திர்ரஹ்மான் அவர்களா? அல்லது கிறிஸ்தவர்களா?

ஆக, அபூ அப்திர்ரஹ்மான் அவர்களே, உங்கள் முஹம்மது செய்தது போல, பல நாட்டு மன்னர்களுக்கு கடிதம் எழுதி, "அஸ்லிம் தஸ்லம்" என்றுச் சொல்லவில்லை, மற்றவர்களை பயமுறுத்தி, "வன்முறையை" பயன்படுத்தி தன் மார்க்கத்தை பரப்பினாரே முஹம்மது அது போல நடக்கவில்லை. [முஹம்மதுவின் வன்முறை கடிதங்கள் பற்றிய தமிழ் கட்டுரைகளின் தொடுப்புக்கள் இக்கட்டுரையில் கடைசியில் தரப்பட்டுள்ளது, படித்துப்பார்த்து, யார் தன் மார்க்கத்தை பரப்ப வன்முறையை தன் ஆயுதமாக பயன்படுத்தினார் என்பதை அறிந்துக்கொள்ளுங்கள்].

அப்படியானால், இஸ்லாமை விட்டு வெளியேறுபவனை கொல்லச் சொல்லும் இஸ்லாம் சட்டம் போலத்தானே இந்த பழைய ஏற்பாட்டின் சட்டமும் என்ற கேள்வி எழும்பும்:

மேலே காட்டப்பட்ட வசனம், இஸ்ரவேல் அல்லாத மக்களை கொல்லச் சொல்லவில்லை என்பதை அறிந்துக்கொண்டோம், ஆனால், தன் தேவனை விட்டு வேறு தெய்வங்களை வணங்குபவர்களை கொல்லச் சொல்வது, இஸ்லாமில் உள்ள ஷரியா சட்டத்திற்கு சமம் இல்லையா என்று சிலர் கேட்கலாம். இது இப்படி இருக்கும் போது, "இஸ்லாமை விட்டு வெளியேறுபவர்களை ஷரியா சட்டம் கொல்வதை மட்டும்" ஏன் பெரிது படுத்தி காட்டுகிறீர்கள் என்று கேட்கலாம்.

மேலோட்டமாக பார்த்தால், இஸ்லாமின் ஷரியா சட்டமும் (வெளியேறுபவனை கொல்லச் சொல்லும் சட்டமும்), இந்த வசனத்தில் சொல்லப்பட்ட விவரமும் ஒன்றாகத்தெரியும், ஆனால், அதன் பின்னணியை கவனித்தல் சில உண்மைகள் புரியும்.

• எகிப்திலே அடிமைகளாக இருந்தவர்களை, தன் வல்லமையை காண்பித்து, அற்புதங்களோடும், அடையாளங்களோடும் அவர்களை கொண்டு வந்தார் தேவன்.
• இது மட்டுமல்ல, அக்காலத்தில் இஸ்ரவேலரை சுற்றியிருந்த பல தெய்வ வழிபாடுகள் செய்யும் மக்கள், இன்றுள்ள பல தெய்வ வழிபாடு செய்யும் மக்களைப்போல அல்ல. அக்காலத்தில் அவர்களின் வழிபாடுகளில், "விபச்சாரம்" ஒருபாகமாக இருந்தது. அவர்கள் தங்கள் தெய்வங்களுக்கு தங்கள் பிள்ளைகளை பலியிட்டு வந்தார்கள். இதைப் பற்றிய எச்சரிப்பு வசனங்களை காணவும்:

உன் தேவனாகிய கர்த்தருக்கு அப்படிச் செய்யாயாக; கர்த்தர் வெறுக்கிற அருவருப்பான யாவையும் அவர்கள் தங்கள் தேவர்களுக்குச் செய்து, தங்கள் குமாரரையும் தங்கள் குமாரத்திகளையும் தங்கள் தேவர்களுக்கு அக்கினியிலே சுட்டெரித்தார்களே. (உபாகமம் 12:31)


நீ உன் சந்ததியில் யாரையாகிலும் மோளேகுக்கென்று தீக்கடக்கும்படி இடங்கொடாதே; உன் தேவனுடைய நாமத்தைப் பரிசுத்தக் குலைச்சலாக்காதே; நான் கர்த்தர். (லேவி 18:21)


கர்த்தர் மோசேயை நோக்கி: பின்னும் நீ இஸ்ரவேல் புத்திரரோடே சொல்லவேண்டியது என்னவென்றால்: இஸ்ரவேல் புத்திரரிலும் இஸ்ரவேலில் வாசம்பண்ணுகிற அந்நியர்களிலும் எவனாகிலும் தன் சந்ததியில் ஒரு பிள்ளையை மோளேகுக்குக் கொடுத்தால், அவன் கொலைசெய்யப்பட வேண்டும்; தேசத்தின் ஜனங்கள் அவன்மேல் கல்லெறியவேண்டும். (லேவி 20:1-2)


தங்கள் குமாரரையும் தங்கள் குமாரத்திகளையும் அக்கினியிலே தகனிக்கிறதற்காக, அவர்கள் இன்னோடும் குமாரனின் பள்ளத்தாக்கிலுள்ள தோப்பேத்தின் மேடைகளைக் கட்டினார்கள்; அதை நான் கட்டளையிடவுமில்லை, அது என் மனதில் தோன்றவுமில்லை. (எரேமியா 7:31)


அவர்கள் என்னை விட்டுவிட்டு, இந்த ஸ்தலத்தை அந்நிய ஸ்தலமாக்கி, தாங்களும், தங்கள் பிதாக்களும், யூதாவின் ராஜாக்களும், அறியாதிருந்த அந்நிய தேவர்களுக்கு அதிலே தூபங்காட்டி, இந்த ஸ்தலத்தைக் குற்றமில்லாதவர்களின் இரத்தத்தினாலே நிரப்பினபடியினாலும், தங்கள் பிள்ளைகளைப் பாகாலுக்குத் தகனபலிகளாகத் தகனிக்கும்படி பாகாலின் மேடைகளைக் கட்டினபடியினாலும் இப்படி வரப்பண்ணுவேன்; இவைகளை நான் கற்பித்ததுமில்லை, சொன்னதுமில்லை, இவைகள் என் இருதயத்தில் தோன்றினதுமில்லை. (எரேமியா 19:4-5)

• இதனால் தான் இப்படிப்பட்ட அருவருப்பு இஸ்ரவேலில் நடக்கக்கூடாது என்று தேவன் விரும்பினார், அந்த மக்களைப் போல நடந்துக்கொள்ளவேண்டாம் என்றார், அவர்களின் பழக்கங்களை பின் பற்றவேண்டாமென்றார்.
• இந்த கட்டளை இஸ்ரவேல் சமுதாயத்திற்கு தரப்பட்ட கட்டளை. இது புதிய ஏற்பாட்டில் கிறிஸ்தவர்களுக்கு பொருந்தாது.

ஏன் பொருந்தாது? என்று சில இஸ்லாமியர்கள் கேட்பார்கள், இப்படிப்பட்டவர்கள் கீழ்கண்ட வசனங்களை படிக்கவும்.

உதாரணத்திற்கு கீழ்கண்ட கட்டளைகளை கவனிக்கவும், இக்கட்டளைகள் இஸ்ரவேல் மக்களுக்காகவா, கிறிஸ்தவர்களுக்காகவா?

அ) பழைய ஏற்பாட்டு கட்டளை: பலிபீடத்தின் அக்கினி எரிந்துக்கொண்டே இருக்கவேண்டும்:


லேவி 6:12-13 பலிபீடத்தின்மேலிருக்கிற அக்கினி அவியாமல் எரிந்து கொண்டிருக்க வேண்டும்; ஆசாரியன் காலைதோறும் அதின்மேல் எரியும்படி கட்டைகளைப் போட்டு, அதின்மேல் சர்வாங்க தகனபலியை வரிசையாக வைத்து, அதின்மேல் சமாதான பலிகளின் கொழுப்பைப் போட்டுத் தகனிக்கக்கடவன். பலிபீடத்தின்மேல் அக்கினி எப்பொழுதும் எரிந்து கொண்டிருக்க வேண்டும்; அது ஒருபொழுதும் அவிந்துபோகலாகாது.


ஆ) பழைய ஏற்பாட்டு கட்டளை: ஆசாரியர்களின் விசேஷித்த உடைகள்: யாத் 28:2-43


யாத் 28:4-5 அவர்கள் உண்டாக்கவேண்டிய வஸ்திரங்களாவன; மார்ப்பதக்கமும், ஏபோத்தும், அங்கியும், விசித்திரமான உள்சட்டையும், பாகையும், இடைக்கச்சையுமே. உன் சகோதரனாகிய ஆரோன் எனக்கு ஆசாரிய ஊழியம் செய்யும்படி, அவனுக்கும் அவன் குமாரருக்கும் பரிசுத்த வஸ்திரங்களை உண்டுபண்ணவேண்டும். அவர்கள் பொன்னும் இளநீலநூலும் இரத்தாம்பரநூலும் சிவப்புநூலும் மெல்லிய பஞ்சுநூலும் சேகரிப்பார்களாக. …

மோசேயின் மூலமாக நூற்றுக்கணக்கான கட்டளைகளை தேவன் கொடுத்தார், நாட்டை ஆளும் கட்டளைகள், தேவனுடையை ஆலயம் சம்மந்தப்பட்ட கட்டளைகள், தேவனுடைய ஊழியம் செய்யும் ஆசாரியர்கள் பற்றிய கட்டளைகள் என்று அனேக கட்டளைகளைக் கொடுத்தார்.

மேலே காட்டப்பட்ட கட்டளைகள், இஸ்ரவேல் மக்களுக்கு முக்கியமாக ஆசாரிய ஊழியம் செய்யும் நபர்களுக்கு கொடுக்கப்பட்டது, அதாவது தேவனுடைய பலிபீடத்தில் அக்கினி எரிந்துக்கொண்டே இருக்கவேண்டும், ஆசாரியர்களுக்கென்று விசேஷித்த உடைகளை தயார்படுத்தி உடுத்தவேண்டும் என்ற கட்டளைகள், இஸ்ரவேல் மக்கள் அனைவருக்கும் அல்ல, முக்கியமாக தேவனின் ஊழியம் செய்பவர்களுக்கு மட்டுமே. இன்று உலகத்தில் எந்த கிறிஸ்தவ சபை இப்படி கட்டைகளை போட்டு காலை முதல் மாலை வரை பலிபீடத்தில் கட்டைகளை எரித்துக்கொண்டு இருக்கிறார்கள்? இயேசுவின் சீடர்கள் இப்படி செய்தார்களா? இல்லையே? ஏன் செய்யவில்லை, காரணம், இது யூத ஆசாரியர்களுக்கு கொடுக்கப்பட்ட கட்டளைகள், கிறிஸ்தவர்களுக்கு அல்ல.

கிறிஸ்தவ ஊழியர்கள் ஏன் இப்படி பலிபீடத்தின் அக்கினி அவியாமல் பார்த்துக்கொள்வதில்லை, ஏன் கிறிஸ்தவ பாஸ்டர்கள், தேவன் சொல்லியபடி, உடைகளை அணிவதில்லை என்று எந்த ஒரு இஸ்லாமியரும் கேட்பதில்லை. ஆனால், கொலை சம்மந்தப்பட்ட வசனத்தை மட்டும் குறிப்பிட்டு கேள்வி கேட்பார்கள், ஏனென்றால், இஸ்லாமுக்கு இருக்கும் பிரச்சனை எதுவோ, அதில் தான் அவர்கள் கண்ணோட்டம் இருக்கும். இஸ்லாமின் வன்முறையை நியாயப்படுத்த, முஹம்மதுவின் வன்முறையை நியாயப்படுத்த இப்படி செய்வார்கள்.

எனவே, அருமை இஸ்லாமியர்களே, கிறிஸ்தவர்கள் தெளிவாக இருக்கிறார்கள், பழைய ஏற்பாட்டை ஏன் படிக்கிறோம், அவைகளில் எவைகளை நாம் பின்பற்ற வேண்டும் என்று எங்களுக்குத் தெரியும்.

இக்கட்டுரையின் தலைப்பிற்கு வருகிறேன், மூன்றாயிரம் ஆண்டுகளுக்கு முன்பு பல தெய்வ வழிபாடுகளை செய்யும் மக்களிடம் இருந்த பழக்கவழக்கங்கள் போல இப்போது உள்ளதா? இஸ்லாமை விட்டு ஒருவன் வெளியெறினால் அவன் தன் பிள்ளைகளை தெய்வங்களுக்கு பலியிடுகின்றானா? இன்னும் சொல்லப்போனால், அனேக இஸ்லாமிய தீவிரவாதிகள் இஸ்லாமை விட்டு வெளியேறி நல்ல மனிதர்களாக மாறுகிறார்கள். நல்ல மனிதர்கள் கூட இஸ்லாமுக்கு மாறும் போது, சிலர் தீவிரவாதிகளாக மாறி மனிதர்களை கொன்று குவித்துக்கொண்டு இருக்கிறார்கள். தீவிரவாத செயல்களில் ஈடுபட்ட பலபேர், இஸ்லாமுக்கு மாறியவர்கள் என்பது குறிப்பிடத்தக்கது (படிக்கவும்: கத்தோலிக்க கிறிஸ்தவர்கள் நான்கு பேர் சிறைச்சாலையில் இஸ்லாமுக்கு மாறி, தீவிரவாதிகளாக மாறியிருக்கிறார்கள், சொந்த நாட்டையே தாக்குகிறார்கள். )

ஆக, அபூ அப்திர்ரஹ்மான் அவர்களே, இஸ்ரவேல் நாட்டிற்கு கொடுக்கப்பட்ட சட்டத்தை கிறிஸ்தவர்கள் பின்பற்றவேண்டும் என்று எதிர்பார்க்காதீர்கள், மற்றும் இஸ்லாமின் வன்முறையை, பயங்கரவாதத்தை நியாயப்படுத்த இந்த யூக்தி உங்களுக்கு வேலை செய்யாது என்பதை தெரிவித்துக் கொள்கிறேன்.

அப்படியானால், ஏன் பின்பற்றாத விவரங்களை, சரித்திரங்களை வைத்துக்கொண்டு, இன்னும் அதை படித்துக்கொண்டு இருக்கிறீர்கள்? என்ற கேள்வி அடுத்தபடியாக இஸ்லாமியர்கள் கேட்பார்கள்.

சரித்திரம் ஏன் படிக்கவேண்டும் சொல்லுங்கள்?

சரித்திரம் எழுதப்படுவது, அதில் உள்ள‌ ஒவ்வொரு வரியையும் பின்பற்றுவதற்காகவா? இல்லை, இல்லவே இல்லை. சரித்திரம் படிப்பது, நம் முன்னோர்களின், அரசர்களின், தலைவர்களின் நல்ல மற்றும் தீய குணங்களை தெரிந்துக்கொண்டு, நல்லவற்றை பின்பற்றவும், தீயவற்றை பின்பற்றாமல் இருக்கவுமேயாகும்.

1) ஆதாமும் ஏவாளும் இறைவனின் கட்டளைக்கு கீழ்படியாமல், கனியை புசித்தார்கள் என்று கிறிஸ்தவத்திலும், இஸ்லாமிலும் படிக்கிறோமே எதற்காக? நாமும் அப்படியே இறைவனுக்கு கீழ்படியாமல் நடக்கவேண்டும் என்பதற்காகவா? இல்லை, நாமும் அவர்களை போல செய்யாமல் இருப்பதற்கு.


2) பார்வோன் இஸ்ரவேல் மக்களை அனுப்பாமல் இருந்ததால், இறைவன் பல அற்புதங்களின் மூலமாக, தன் மக்களை எகிப்திலிருந்து விடுவித்தார் என்று நாம் படிப்பது, நாமும் பார்வோனை போல கீழ்படியாமல் இருக்கவா? "இல்லை", நாமும் பார்வோனைப்போல செய்யாமல் இருப்பதற்காக.


3) உலகத்தில் மிகவும் கொடுமையான அரசர்களின், தலைவர்களின் வாழ்க்கை வரலாறை புத்தகமாக பதித்து, கடைகளில் விற்பது, அதனை மக்கள் படித்து அவர்களைப் போல மக்களும் கொடுமைகளை செய்யவேண்டும் என்பதற்காகவா? இல்லை, அவர்களைப் போல செய்யாமல் நாம் எச்சரிப்பை அடைவதற்காக.

இதனையே பைபிள் இவ்விதமாகச் சொல்கிறது:

வேதவாக்கியங்களெல்லாம் தேவ ஆவியினால் அருளப்பட்டிருக்கிறது; தேவனுடைய மனுஷன் தேறினவனாகவும், எந்த நற்கிரியையுஞ் செய்யத் தகுதியுள்ளவனாகவும் இருக்கும்படியாக,

அவைகள் உபதேசத்துக்கும், கடிந்துகொள்ளுதலுக்கும், சீர்திருத்தலுக்கும், நீதியைப் படிப்பிக்குதலுக்கும் பிரயோஜனமுள்ளவைகளாயிருக்கிறது. (2 தீமோத்தேயு 3:16-17)

வேதவாக்கியங்கள் இருப்பது,

1) உபதேசம் செய்வதற்கும்,

2) தவறான வழியில் நடக்கும் போது, அவனுக்கு சரித்திரத்தைச் சொல்லி, எடுத்துக்காட்டுச் சொல்லி, கடிந்துக்கொள்வதற்கும்,

3) திருந்தாதவர்களை சீர்திருத்துவதற்கும்,

4) நீதியாகவும், நேர்மையாகவும் நடக்க அறிவுரை சொல்வதற்குமேயாகும்.

எனவே, அருமை இஸ்லாமிய நண்பரே, பழைய ஏற்பாட்டில் கிறிஸ்தவர்கள் படிப்பது, தங்களை சீர்திருத்திக்கொள்ளவும், நீதியை கற்றுக்கொள்ளவும் படிப்பினை பெறுவதற்காகவே தவிர, மற்றவர்களுக்கு சொல்லப்பட்ட அனைத்து கட்டளைகளையும், தனக்கே சொல்லப்பட்டது போல நினைத்துக்கொண்டு வாழ்வதற்காக அல்ல.

நாங்கள் ஏற்றுக்கொள்ளமாட்டோம், வேதம் என்றுச் சொன்னால், அதில் பின்பற்றப்படாத கட்டளைகள் இருக்கக்கூடாது. மற்றவர்களுக்குச் சொன்ன கட்டளைகள், மற்றவர்களின் சரித்திரம் இருக்கக்கூடாது என்று இஸ்லாமியர்கள் பிடிவாதம் பிடித்தால், கீழ்கண்ட விவரங்களை படியுங்கள்.

குர்‍ஆனும் பழைய ஏற்பாட்டு சரித்திர நிகழ்வுகளும்:

பழைய ஏற்பாட்டு சரித்திரத்தை ஏன் இன்னும் பைபிளில் வைத்து படிக்கிறீர்கள் என்று கிறிஸ்தவர்களுக்கு எதிராக தங்களின் விரல்களை நீட்டும் இஸ்லாமியர்கள், கொஞ்சம் தங்கள் குர்‍ஆனை திருப்பிப்பார்த்தால் நலமாக இருக்கும்.

குர்‍ஆனில் ஆதாமின் சரித்திரம் உண்டு, அவரின் சந்ததிகள் பற்றிய சரித்திரம் உண்டு. மோசேயின் சரித்திரம் உண்டு, அவரிடம் அல்லாஹ் பேசிய வசனங்கள் உண்டு. மோசே இஸ்ரவேல் மக்களிடம் பேசிய வசனங்கள் உண்டு. இன்னும் அனேக பழைய ஏற்பாட்டு உரையாடல்கள், நிகழ்ச்சிகள் குர்‍ஆனில் உண்டு. எனவே, பைபிளில் பழைய ஏற்பாட்டு சரித்திரம் இருக்கக்கூடாது என்றுச் சொல்லும் இஸ்லாமியர்கள் தங்கள் குர்‍ஆனில் உள்ள பழைய ஏற்பாட்டு சரித்திரத்தை நீக்க தயாராக இருக்கிறீர்களா?

ஏனென்றால்,

அல்லாஹ் ஆதாமிடம் பேசிய வசனங்கள் உங்களுக்கு எதற்கு?


அல்லாஹ் மோசேயிடம் பேசிய வசனங்களை இன்றுள்ள இஸ்லாமியர்கள் ஏன் படிக்கவேண்டும்?


மோசே இஸ்ரவேல் மக்களிடம் பேசிய சரித்திரம் உங்களுக்கு எதற்கு?


இயேசுவின் நிகழ்ச்சியும், மரியாளின் நிகழ்ச்சியும் சரித்திரம் தானே! அது எதற்கு இப்போது குர்‍ஆனில் இருக்கவேண்டும்?


முஹம்மதுவிடம், சரித்திர நிகழ்வுகளை பயன்படுத்தி, அவருக்குச் சொல்லி, ஏன் அல்லாஹ் மக்களை எச்சரிக்கவேண்டும்? இவைகளில் உங்களுக்கு படிப்பினை உள்ளது என்றுச் சொல்லவேண்டும்?


பைபிளில் சரித்திரம் வேண்டாம் என்று அறிவுரைச் சொல்லும் அறிஞர்கள் தங்கள் குர்‍ஆனில் சரித்திரத்தை நீக்குவார்களா? இஸ்லாமியர்கள் ஆதாம், ஆபிரகாம், மோசே, தாவீது, மற்றும் இயேசுவைப் பற்றிய சரித்திர நிகழ்ச்சிகள் பற்றி வசனங்கள் குர்‍ஆனில் வரும் போது அவைகளை படிக்காமல், அடுத்த பக்கம் திருப்பிவிடுவீர்களா?

இரத்து செய்யப்பட்ட குர்‍ஆன் வசனங்கள்:

சரித்திர நிகழ்ச்சியை விடுங்கள், இரத்து செய்யப்பட்ட குர்‍ஆன் வசனங்கள் ஏன் இன்னும் குர்‍ஆனில் இருக்கிறது?

பல குர்‍ஆன் வசனங்கள் இரத்து செய்யப்பட்டது என்று இஸ்லாமிய அறிஞர்கள் சொல்கிறார்கள்.

காலத்திற்கு ஏற்ப சில சட்டங்களை அல்லாஹ் மாற்றுவார், இதனை இரத்து செய்தல் என்று இஸ்லாமிய அறிஞர்கள் சொல்வார்கள். அப்படியானால், முதன் முதலில் சொல்லப்பட்ட வசனங்களுக்கு பதிலாக புதிய வசனங்கள் வந்துவிட்டதால், பழைய வசனங்களை, பின் பற்றத் தேவையில்லாத வசனங்களை இன்னும் ஏன் இஸ்லாமியர்கள் படித்துக்கொண்டு இருக்கிறார்கள்.

முக்கியமாக, அபூ அப்திர் ரஹ்மான் அவர்களே, குர்‍ஆனை நீங்கள் படிக்கும் போது, இரத்து செய்யப்பட்ட வசனங்கள் வருமிடத்தில், அவைகளை விட்டு வேறு வசனங்களை படிப்பீர்களா? அல்லது அவைகளையும் படிப்பீர்களா?

நான் படிப்பேன் என்றுச் சொல்வீர்கள் என்று எனக்குத் தெரியும், அப்படியானால், பின்பற்ற வேண்டாத வசனங்களை ஏன் படிக்கிறீர்கள்? ஏன் இன்னும் குர்‍ஆனில் அவ்வசனங்களை வைத்திருக்கிறீர்கள்?

ஏன் இன்னும் பழைய ஏற்பாட்டை படிக்கிறீர்கள் என்று கிறிஸ்தவர்களை கேட்கும் இஸலாமியர்களே, ஏன் இன்னும் பழைய ஏற்பாட்டு சரித்திர நிகழ்ச்சிகளை நீங்கள் குர்‍ஆனில் வைத்திருக்கிறீர்கள்? அவைகளைப் பற்றி ஏன் பிரசங்கங்கள் செய்கிறீர்கள்? 3000 ஆண்டுகளுக்கு முன்பு நடந்த‌ சரித்திரம் உங்களுக்கு எதற்கு?

அபூ அப்திர ரஹ்மான் அவர்களிடம் கேட்கிறேன்: பழைய ஏற்பாடு முதற்கொண்டு, இயேசு கிறிஸ்து வரை அனேக நபிகளின் பெயர்கள், நிகழ்வுகள், உரையாடல்கள் உங்கள் குர்‍ஆனில் உண்டு. அவைகள் சரித்திரங்கள் ஆகும், அவைகளை எப்போது நீக்கப்போகிறீர்கள்? ஏன் இப்படி கேட்கிறேன் என்றால், எங்கள் வேதத்தில் எது இருக்கக்கூடாது என்றுச் சொல்கிறீர்களோ, அதே விவரம் நீங்கள் வேதமாக கருதும் புத்தகத்தில் மட்டும் ஏன் உள்ளது?

பழைய ஏற்பாட்டு அனைத்து விஷயங்களையும் குர்‍ஆனிலிருந்து நீக்கிவிட்டால், எவ்வளவு பக்கங்கள் வசனங்கள், அதிகாரங்கள் மிஞ்சும்? "ஆதாம், ஆபிரகாம், மோசே, தாவீது, ... மரியாள், யோவான் மற்றும் இயேசு" போன்ற பெயர்கள் வரும் அனைத்து வசனங்களையும் நீக்கிவிட்டால் என்ன மிஞ்சும்? அவைகள் பழைய கதைகள் ஆயிற்றே உங்களுக்குத் தேவையில்லை அல்லவா? என்ன முடிவு எடுக்கப்போகிறீர்கள்?

கிறிஸ்தவர்கள் தெளிவாக இருக்கிறார்கள், எங்களுக்கு பழைய ஏற்பாட்டு நபர்களின் வாழ்க்கை வரலாறு தேவை, அவைகள் எங்களுக்கு எச்சரிக்கையாகவும், சில நேரங்களில் சவாலாகவும் இருக்கின்றன. மற்றும் பழைய ஏற்பாடு படிப்பதினால், எங்கள் தேவன் எப்படிப்பட்டவர், அவரின் வல்லமை என்ன? அவர் எப்போது நம்மை தண்டிப்பார், எப்போது உதவி செய்வார், அவருக்கு முன்பாக பரிசுத்தமாக வாழ்ந்தவர்களின் முடிவு என்ன? துன்மார்க்க வாழ்க்கை வாழ்ந்தவர்களின் முடிவு என்ன என்பதை நாங்கள் அறிந்துக்கொண்டு, எங்களை நாங்கள் திருத்திக்கொள்கிறோம்.

எனவே, எங்களுக்கு பழைய ஏற்பாடு தேவை, அதே நேரத்தில் இயேசுவின் போதனையையும் நாங்கள் புதிய ஏற்பாட்டில் கண்டு மகிழ்கிறோம்.

ஆனால், உங்களின் நிலை என்ன? உங்களிடம் இருக்கும் சரித்திரங்கள் உங்களுக்கு எதற்கு உதவுகின்றன? நாங்கள் சொல்லும் இதே காரணத்தை நீங்களும் சொல்லப்போகிறீர்களா?

அதாவது, குர்‍ஆனில் உள்ள பழைய ஏற்பாட்டு நிகழ்ச்சிகளை, உரையாடல்களை படித்து, நாங்கள் எச்சரிக்கை அடைகிறோம், படிப்பினை பெறுகிறோம்., சில நேரங்களில் உற்சாகமடைகிறோம் என்றுச் சொல்லப்போகிறீர்களா? இப்படி நீங்கள் சொல்வதாக இருந்தால், கிறிஸ்தவர்கள் தங்கள் வேதத்தை படித்து ஏன் படிப்பினை பெறக்கூடாது?

முடிவுரை:அருமையான இஸ்லாமிய நண்பர்களே, முதலில் பழைய ஏற்பாட்டில் என்ன உள்ளது? பழைய ஏற்பாட்டிற்கும் புதிய ஏற்பாட்டிற்கும் இடையே உள்ள வித்தியாசம் என்ன? கிறிஸ்தவர்களை கட்டுப்படுத்தும் கட்டளைகள் என்ன? போன்றவற்றை தெரிந்துக்கொண்டு எழுதுங்கள். மோசேயின் மூலமாக தேவன் இஸ்ரவேலருக்கு கொடுத்த நூற்றுக்கணக்கான கட்டளைகளில் எந்த கட்டளைகள் கிறிஸ்தவர்கள் பின் பற்றவேண்டும் என்பதை தெரிந்துக்கொள்ளுங்கள். முஹம்மது யூதர்களை வெறுத்தாரா? நாமும் வெறுப்போம், அவர் இப்படி செய்தாரா நாமும் இப்படி செய்வோம் என்று இஸ்லாமியர்களில் சிலர் ந‌டந்துக்கொள்வது போல கண்மூடித்தனமாக கிறிஸ்தவர்கள் நடக்கமாட்டார்கள்.

இஸ்லாமியர்களுக்கு நான் சொல்லிக்கொள்வது, "நீங்கள் எவ்வளவு தான் முயற்சித்தாலும், இஸ்லாமையும் வன்முறையையும் உங்களால் பிரிக்கமுடியாது, உங்கள் நபியின் வாழ்க்கை வரலாறு நம்மிடம் இருக்கும் வரை, குர்‍ஆன் இருக்கும் வரை, ஹதீஸ்கள் இருக்கும் வரை, இஸ்லாம் என்னும் நாணயத்தின் இன்னொரு பக்கத்தில் "வன்முறை" இருந்துக்கொண்டே இருக்கும்".

புதிய ஏற்பாட்டு வசனம் பற்றி அபூ அப்திர் ரஹ்மான் அவர்களின் வரிகளுக்கு அடுத்த கட்டுரையில் பதிலைத் தருகிறேன்.

முஹம்மதுவும் வன்முறையும்:

• முஹம்மதுவும் அபு அஃபக்கின் கொலையும்

• ஈஸா குர்‍ஆன் மற்றும் அபூமுஹை : அஸ்லிம் தஸ்லம் (أسلم تسلم)

• இஸ்லாம் வாளால் தான் பரவியது, முகமது எழுதிய கடிதங்களே இதற்கு சாட்சி - அபுமுஹை கட்டுரைகளில்

• Muhammad and his personal enemies

• Muhammad's excessive cruelty

• Torture in the Quran and early Islam - Where is Islamic justice and human rights?

Source: http://sites.google.com/site/isakoran/rebuttals/abunoora/cpaarvai_violence31